У сярэдняй школе № 44, якая знаходзіцца ў мікрараёне Малая Бароўка, пасля капітальнага рамонту ўрачыста адкрылі абноўлены басейн. Аб’ект не функцыянаваў 5 год, а ў снежні 2023 пачалася яго рэканструкцыя. Ужо на гэтым тыдні навучэнцы ўстановы адукацыі пачалі наведваць урокі плавання.

Сярэдняя школа № 44 пачала сваю дзейнасць у 2000 годзе. Ужо тады ў ёй існаваў басейн. Аднак за васямнаццаць год эксплуатацыі аб’ект перастаў адпавядаць нормам, а значыць, функцыянаваць не мог. Пяць год басейна ў Малой Бароўцы не было. За гэты час паспелі падрасці дзеці, якія ніколі не плавалі. А памятаюць басейн да рэканструкцыі толькі старшакласнікі.

Сёння ўстановай адукацыі кіруе малады і ініцыятыўны дырэктар, які, атрымаўшы падтрымку абласных і гарадскіх кіраўнікоў, рэалізаваў праект па мадэрнізацыі і паўторным ўвядзенні ў эксплуатацыю спартыўнага аб’екта.

Напрыканцы мінулага тыдня адбылося адкрыццё абноўленага басейна. Сімвалічную чырвоную стужку перарэзалі памочнік Прэзідэнта – інспектар па Магілёўскай вобласці Леанід Мартынюк, старшыня Магілёўскага аблвыканкама Анатоль Ісачанка, старшыня гарвыканкама Аляксандр Студнеў і дырэктар школы Антон Лабаноўскі. Вучні і настаўнікі падрыхтавалі для гасцей прэзентацыю дасягненняў школы.

Анатоль Ісачанка ўручыў установе адукацыі сертыфікат на 25 000 беларускіх рублёў. Губернатар адзначыў, што сёння ў вобласці робіцца ўсё для паляпшэння дабрабыту яе жыхароў.  Новы функцыянальны басейн – толькі адзін з вялікага шэрагу аб’ектаў, якія кожны год уводзяцца ў эксплуатацыю ў Магілёўскай вобласці.

– Трэба як мага болей рабіць для людзей, ствараць інфраструктуру. І мы планамерна гэта робім. Сёння адкрыты чарговы аб’ект. Самае галоўнае, што ён не першы і не апошні. У нас распрацаваная цэлая праграма, згодна якой мы дзейнічаем. Дзякуючы, канешне, нашай дзяржаве, таму, што ёсць стабільная сітуацыя, мы можам прымаць рашэнні і ажыццяўляць іх. Мабыць, у маштабе краіны гэта невялікі аб’ект. Аднак для Магілёва, для Малой Бароўкі, для дзяцей і бацькоў ён мае вялікае значэнне. Цяпер дзеці могуць займацца спортам і ўмацоўваць сваё здароўе. Зараз мы вядзем будаўніцтва дзвюх школ: у Асіповічах і Магілёве, яшчэ дзве праектуюцца. У 2023 годзе адкрылі тры дзіцячыя садкі, вядзецца праектаванне яшчэ пяці. І гэта толькі сістэма адукацыі, не кажучы пра ахову здароўя, дарогі, вуліцы… У 2024 годзе, думаю, увядзем аб’ектаў яшчэ больш, чым за 2023. Гэта запланавана і, самае галоўнае, ужо вядзецца будаўніцтва.

Басейн у Малой Бароўцы быў адрэстаўраваны ў рэкордныя тэрміны. За кароткі час за сродкі гарадскога бюджэту правялі рамонт вялікай і малой чаш басейна, распраналак, душавых, дадатковых памяшканняў,  замянілі ўсё тэхналагічнае абсталяванне, дэкарыравалі сцены галерэі-карыдора барэльефамі. Сёння ёсць магчымасць займацца з рознаўзроставымі групамі дзяцей у дзвюх розных залах. Вялікі басейн мае тры дарожкі па 25 метраў, ёсць таксама малая чаша для вучняў 1-4 класаў.

У школе – больш за 480 вучняў. Мікрараён з кожным годам развіваецца, а гэта значыць, што спартыўны аб’ект дакладна будзе карыстацца попытам. З пачаткам заняткаў цягнуць не будуць, адзначылі ў школе. Кожны клас раз на тыдзень будзе наведваць басейн.

Вучань дзясятага класа Арцём Лабодыраў расказаў, што запуску басейна чакаў з нецярпеннем: сам любіць плаваць, ды і малодшых брата з сястрою таксама хацеў бы далучыць да гэтага карыснага хобі.

– Калі даведаліся, што басейн адрэстаўруюць, узрадаваліся. Доўга чакалі, у нашай школе ёсць вучні, якія ўвогуле ніколі не плавалі. Падтрымлівалі нашага дырэктара ў гэтым пачынанні, чым маглі – дапамагалі. Вельмі люблю плаваць і абавязкова буду наведваць новы басейн. Да таго ж у мяне падрастаюць малодшы брат і сястра, для іх гэта таксама цудоўная магчымасць развівацца, тым больш, што для маленькіх дзетак у басейне прадугледжана асобная зала.

Алёна Кухарава

Фота Влада Жыгадла