Выдатніца, пераможца алімпіяды па беларускай мове і літаратуры, пераможца шматлікіх творчых, літаратурных, мастацкіх конкурсаў, удзельніца гарадскога маладзёжнага клуба «Што? Дзе? Калі?»…
Валерыя Баюрава, вучаніца 11 «В» класа СШ № 45 – гонар бацькоў і школы, мая таленавітая вучаніца.

Тыдзень таму перамогай Валерыі завершыўся другі этап рэспубліканскай алімпіяды па беларускай мове і літаратуры. І ўжо праз тыдзень яна зноў у ліку пераможцаў. На гэты раз ёй пакарыўся рэспубліканскі конкурс сачыненняў на тэму «Што такое адзінства?», які праводзіўся ў рамках рэспубліканскага «Марафону адзінства».

Ва ўрачыстай абстаноўцы ў Абласным цэнтры творчасці адбылося ўзнагароджанне пераможцаў абласнога этапу адкрытага конкурсу малюнкаў вучняў пачатковых класаў «Мы разам» і абласнога этапу рэспубліканскага конкурсу сачыненняў на тэму «Што такое адзінства?». Павіншавалі пераможцаў і ўручылі ім каштоўныя падарункі намеснік міністра адукацыі Кацярына Пятруцкая і начальнік галоўнага ўпраўлення па адукацыі Магілёўскага аблвыканкама Андрэй Заблоцкі.
Кацярына Аляксандраўна ў сваёй прамове выказала захапленне талентам дзяцей і пажадала ім далейшых творчых поспехаў, падкрэсліўшы значнасць разумення паняцця «адзінства» для кожнага грамадзяніна нашай непаўторнай Беларусі.

Вольга Лунькова, настаўнік беларускай мовы і літаратуры